O presidente da Xunta, Alfonso Rueda, avogou por defender a Constitución “os 365 días do ano” e “moito máis” ante a existencia dun Goberno central que “cuestiona as institucións” e enfróntase a “gravísimas” denuncias por “casos de corrupción que pon en dúbida case a súa lexitimidade”.

En declaracións aos medios antes de participar este venres na recepción oficial no Congreso con motivo do Día da Constitución, o mandatario galego dixo que “está moi ben” celebrar o 6 de decembro pero a Carta Magna “hai que mantela vixente os 365 días do ano”. 

“E moito máis cando vemos que desde o Goberno central cuéstionanse as institucións, que aparecen casos de corrupción que pon en dúbida case a súa lexitimidade e que vemos como está as expensas de decisións de socios que non cren na Constitución”, aseverou Rueda.

Neste senso, remarcou que esta “defensa” da Constitución “todos os días” e “máis que nunca” se fai “moito máis” desde unha nacionalidade histórica como Galicia, que conta cunha “entidade propia moi forte” pero que se atopa “cómoda” dentro do marco constitucional.

“Novo sobresalto”

Para Rueda, “cada día” hai un “novo sobresalto” e “unha nova acusación” contra o Goberno, ao que censura a súa “tese” de “ridiculizar as denuncias e sacarlles importancia”, algo que, ao seu xuízo, “non funciona”.

“Está cada vez máis claro que hai cousas moi graves que deberían ser explicadas e que non están a ter unha explicación”, sinalou o presidente galego, que considera que hai “casos gravísimos” que afectan ao PSOE e ao presidente do Goberno, Pedro Sánchez, e “a súa contorna persoal” que “nunca se viron en España con esta intensidade”.

Reforma

Pola súa banda, o secretario xeral do PSdeG, José Ramón Gómez Besteiro, enxalzou a “vixencia” da Constitución, que constitúe “desde hai 46 anos” o “texto fundamental de unión entre todos os españois”. 

En declaracións aos medios este venres en Lugo no acto da Subdelegación do Goberno na provincia, Besteiro sinalou que é posible falar de reformala pero “sempre desde o compromiso da defensa do texto como pedra angular da democracia”.

Así, apelou a dar resposta aos “retos” que España ten “por diante como sociedade democrática”, entre os que situou a vivenda, a igualdade e a loita contra a violencia machista para, desta forma, “avanzar cara a unha sociedade máis igualitaria e xusta”.

Besteiro cre que “o marco configurado pola Constitución segue garantindo un sistema institucional que debe fortalecerse e manterse activo para o futuro”. “Celebramos non só o legado da Constitución, senón o compromiso co seu espírito para seguir avanzando cara a unha sociedade máis igualitaria e xusta”, subliñou o socialista. 

"Noso estatus"

Noutro senso, a portavoz nacional do BNG, Ana Pontón, reclamou un “novo status” para Galicia fronte a unha Constitución española que “nega” e “limita” os seus “dereitos”, “pon obstáculos ao desenvolvemento e benestar dos galegos” e “consolida” unha “institución tan anacrónica e antidemocrática como a monarquía”.

 “Non podemos celebrar unha Constitución que nos nega”, aseverou Pontón, apoiada pola recentemente renovada dirección do Bloque, no acto celebrado no Panteón de Galegos Ilustres no que a formación conmemorou a fundación o 6 de decembro de 1931 do Partido Galeguista.

 Durante a súa intervención, a líder nacionalista reivindicou o legado de Castelao, de cuxo “ideario” o BNG se sente “herdeiro”. 

“Temos a certeza de que chegará o momento en que se recoñeza o dereito soberano das nosas nacións”, subliñou Pontón en alusión á declaración fundacional do Consello de Galicia, o goberno no exilio impulsado por Castelao desde Arxentina.