Achégase o Día das Letras Galegas, e unha das mellores cousas que se pode facer, ademais de felicitar a data e disfrutar o festivo, é celebralo con propiedade: lendo libros en galego. Por iso en Tendencias seleccionamos cinco títulos na nosa lingua, aptos para tódolos gustos e idades. 

¡A disfrutar lendo!

1. Cantares gallegos (Rosalía de Castro) 
   Rosalía de Castro (1837-1885) é a voz máis emblemática da nosa literatura, símbolo do Rexurdimento cultural no século XIX, e Cantares gallegos, publicado por vez primeira o 17 de maio de 1863, representa o primeiro gran paso cualitativo cara á madurez poética de Galicia. Inspirada nas raíces do seu pobo, nos ritmos e fórmulas tradicionais, na fala viva, nos costumes e nas xentes que a autora sentía arredor de si, este libro vai máis alá e encarna, dende sempre, a esencia máis íntima do sentimento galego.
2. Memorias dun neno labrego (Xosé Neira Vilas)
   “Eu son… Balbino. Un rapaz de aldea. Coma quen di, un ninguén. E ademais, pobre”. Así comeza un dos clásicos da literatura galega, escrito por Xosé Neira Vilas en 1961. Unha das reedicións máis recentes, de Galaxia, é unha novela gráfica ilustrada por Iria Aldegunde. 
3. Fariña (Nacho Carretero) 
   Un libro secuestrado por orde xudicial e baseado na orixe e idiosincrasia do narco en Galicia, que deu lugar a unha exitosa adaptación en forma de serie televisiva. ¿Alguén dá máis? O xornalista Nacho Carretero propón un percorrido polas rías galegas, escenario do nacemento e crecemento dunha rede de narcotráfico que acadou o seu punto álxido na xeneración de Sito Miñanco ou o clan dos Oubiña. A edición en galego é de Xerais. 
4. Basta! Guía de autodefensa feminista para adolescentes (Marion Le Muzic e María Kronsky) 
   Hércules de Ediciones presentou este ano unha colección de libros sobre igualdade e feminismo en galego, entre os que se encontra "Basta! Guía de autodefensa feminista para adolescentes (e máis…)". Este innovador cómic, creado por Marion Le Muzic e María Kronsky, e traducido ao galego por Raquel Senra, ofrece ás máis novas ferramentas esenciais para identificar e combater comportamentos machistas no seu día a día.
5. Minilibros imperdibles (autoría variada) 
   Quen ten nenos e nenas pequenas sabe que os minilibros e libros de Kalandraka sempre son unha boa opción. O coelliño branco, A galiña roxa, os Chibos chibóns, A casa da mosca chosca, A ratiña presumida, Garavanciño e O poliño da abeleir son títulos básicos que forman parte desta recompilación en formato minilibro, moi cómoda para viaxar ou saír de casa.